L' comitê  "Amisc de Siur Heinrich"

Ai 14 de agost 2009 él gnü metü sö a La Val, tla Val Badia, söl consëi y la sbürla de tröc fedei, le comitê: "Amîsc de siur Heinrich", cun le fin da tignì vi le recort, la personalité y l' ejëmpl de siur Heinrich Videsott, por encorajè da menè inant le prozes de süa beatificaziun.

Col decret dl 11 de jenà 2012 à le vësco dla diozeja da Balsan – Porsenù dot. Ivo Muser reconesciü chësc comitê y sò obietîf y tl medemo tëmp àl confermè la nominaziun de n apostulator, che se cruziarà dl prozes dla beatificaziun dl stimé ploan da La Val. Te dütes les pertes dl monn, olach' al röia la fama de sò carisma y al vëgn esperimenté la forza de süa interzesciun, crëscel la veneraziun y la crëta te ël. Tres deplü porsones vëgn a La Val te cortina a perié sön süa fossa.

Tröc é inće i scrić che cunta de süa vita passada tla santité y de süa interzesciun, testimoniada da chi ch'à ciafè aiüt y le venerëia. Porchël vëgnel laurè, cun gran fidënza y cun l'aiüt generus di fedei por arjunje prësc le fin che nes ùn metü dant: süa beatificaziun.


Mëssa Novela 1937 (Montal)
 

La renomënza y la santité de siur Heinrich Videsott s’à slarié fora te süa valada y à arjunt y superé i confins de nosta regiun. Tl zënter de süa vita êl na fede sterscia, l’oraziun, l’abnegaziun, l’amur a Santa Maria, a Chël Bel Dî y a so proscim, ch’al benedî y acompagnâ vigni dé cun süa benedisciun.

Süa lungia vita é stada rica de spiritualité y de buntè. Al ê sciöche n bun pere, arjigné inće a fa sacrifizi por i sü. Al ê bun da ti trasmëte la pêsc y la serenité a chi che gnô a le chirì por ciafè aiüt, ćiodich’ai podô joté fora so cör, sigüsc de gni ascutà sö y capis.

So carisma y süa benedisciun â na forza straordinaria. Chël testimoniëia chëres porsones, che l’à conesciü y ê jüdes  da ël a chirì aiüt y consëi. Zënza mai se stancé y se spazientè, ascutâl sö i pici y gragn problems corporai y spirituai dla jënt, periâ por ëi y i racomanâ al amur de Chël Bel Dî y de Santa Maria.

 





Oraziun de benedisciun


Tl inom dl Pere y dl Fì y dl Spirit Sant.


Por l'interzesciun de Santa Maria y de nüsc Sanć protetûrs, de Sant Antone da Padua, de San Jan Vianney, curat d'Ars y dl Beat Ujöp Freinademetz vëgnes jö la benedisciun de Dî, l'onipotënt, sön nos y nostes families y la forza inesauribla dla scincunda dl Spirit Sant se lasces jö te nosc cör.

Tl inom dl Pere y dl Fì y dl Spirit Sant.


L'Onipotënt nes straverdes da düć i mai dl corp y dl' anima, da inzidënć sön strada y da desgrazies söl laûr.

Tl inom dl Pere y dl Fì y dl Spirit Sant.


Ch' al s'impëies te nüsc cörs le füch de so amur divin y verdes tres por la maiù gloria de Dî. Cun la grazia de Dî nes romagnes la fede y la pêsc regnëies te nüsc cörs y te nostes families por la santificaziun de nosta anima.

Tl inom dl Pere y dl Fì y dl Spirit Sant.
Amen.