Bëgngnüs


La renomënza y la santité de siur Heinrich Videsott s’à slarié fora te süa valada y à arjunt y superé i confins de nosta regiun. Tl zënter de süa vita êl na fede sterscia, l’oraziun, l’abnegaziun, l’amur a Santa Maria, a Chël Bel Dî y a so proscim, ch’al benedî y acompagnâ vigni dé cun süa benedisciun.

Süa lungia vita é stada rica de spiritualité y de buntè. Al ê sciöche n bun pere, arjigné inće a fa sacrifizi por i sü. Al ê bun da ti trasmëte la pêsc y la serenité a chi che gnô a le chirì por ciafè aiüt, ćiodich’ai podô joté fora so cör, sigüsc de gni ascutà sö y capis.

So carisma y süa benedisciun â na forza straordinaria. Chël testimoniëia chëres porsones, che l’à conesciü y ê jüdes  da ël a chirì aiüt y consëi. Zënza mai se stancé y se spazientè, ascutâl sö i pici y gragn problems corporai y spirituai dla jënt, periâ por ëi y i racomanâ al amur de Chël Bel Dî y de Santa Maria.


 La Valle Santa Barbara
La Val - Alta Badia - S. Barbara

Fora de süa vita

Siur Heinrich Videsott é nasciü ai 03 de messè 1912 a Mantëna todëscia, na picera fraziun dl comun da San Laurënz. Al é gnü consacrè prou a Porsenù l’ann 1937 y à metü man süa misciun da caplan y spo da ploan te deplü cöres dla diozeja da Porsenù. L’ann 1964 él rovè a La Val y é stè dailò famëi spiritual ćina ch’al é jü in ponsiun l’ann 1987.
Spo él romagnü a La Val ćina süa mort ai 09.12.1999.

Siur Videsott se fajô notè por süa gran disponibilité y süa paziënza da ascutè sö chi che gnô da ël por gnì daidà te sües pices o gran soferënzes dl corp y dl’anima.

Sciöche n bun pere, àl dagnëra parores de confort y cun sües oraziuns, so carisma y süa benevolënza êl bun de daidé tröpes porsones, che le chirî cun fiduzia y le periâ do süa interzesciun prò Chël Bel Dî. Süa benedisciun ê dagnëra fontana de grazies y de richëzes spirituales. Al periâ dër tröp y viô na fede scëmpla mo tlera. Al n’ê nia ma conesciü te süa ploania y te nosta valada, mo te döt Südtirol y jö por la Talia. Deache tröc reconësc d’ester gnüs daidà por süa interzesciun, é süa stima ćiamò chersciüda dô süa mort y à arjunt y superé i confins dla Talia.

Oraziun de benedisciun
 

Por l'interzesciun de Santa Maria y de nüsc Sanć protetûrs, 
     de Sant Antone da Padua, 
     de San Jan Vianney, curat d'Ars 
     y dl Beat Ujöp Freinademetz
vëgnes jö la benedisciun de Dî, l'onipotënt, sön nos y nostes families
y la forza inesauribla dla scincunda dl Spirit Sant se lasces jö te nosc cör.

 

Tl inom dl Pere y dl Fì y dl Spirit Sant.
Ch' al s'impëies te nüsc cörs le füch de so amur divin
y verdes tres por la maiù gloria de Dî.
Cun la grazia de Dî nes romagnes la fede y la pêsc regnëies
te nüsc cörs y te nostes families
por la santificaziun de nosta anima.

<span calibri",sans-serif;calibri;="" times="" new="" roman";="" "="">Tl inom dl Pere y dl Fì y dl Spirit Sant. Amen.